वीरगञ्ज असोज १९ । जनकपुरधामकी आरती साह मृत्यु प्रकरणमा पुर्पक्षका लागि थुनामा रहेका पति र ससुरा उच्च अदालत जनकपुरको आदेशमा रिहा भएका छन् ।
उच्च अदालत जनकपुरको आदेशमा पति मोतीबाबु साह र ससुरा मदन मोहन ब्याहुत सुडी साधारण तारेखमा रिहा भएका हुन् ।
मुख्य न्यायाधीश शारदा सुवेदी र किरणकुमार पोखरेलको संयुक्त इजलासले पति र ससुरालाई साधारण तारेखमा छोड्ने आदेश दिएको अदालतका श्रेस्तेदार खड्गराज अधिकारीले जानकारी दिए ।
गत जेठ ७ गते आफ्नै घर जनकपुरधाम उपमहानगरपालिका – ९ थापा चोकमा मृत अवस्थामा फेला परेकी आरतीको हत्या भएको भन्दै माइती पक्षले जाहेरी दिएपछि प्रहरीले उनका पति मोतीबाबु साह र ससुरा मदन मोहन ब्याहुत सुडीलाई पक्राउ गरी अनुसन्धान अगाडि बढाएको थियो ।
दुवै जनामाथि असार १ गते जिल्ला अदालत धनुषामा सरकारी वकिलको कार्यालयले कर्तव्य ज्यानको मुद्दा दर्ता गरेको थियो । त्यही मुद्दामा असार ५ गते जिल्ला अदालत धनुषाले पति र ससुरालाई पुर्पक्षका लागि थुनामा पठाउने आदेश दिएको थियो ।
मृतक आरतीकी बुबाले विनोद साहले दिएको जाहेरीमा पति मोतीबाबु र ससुरा मदन मोहनले कर्तव्य ज्यान गरेको भन्ने कुरामा आधार प्रमाण नदेखिएको उच्च अदालतको ठहर छ । अदालत समक्ष पति र ससुराले आरोप इन्कार गरेको आदेशमा उल्लेख छ । उच्च अदालतले धनुषा जिल्ला अदालतबाट भएको आदेश बदर गरेको छ ।