वीरगंज, १८ असोज/
बारा, प्रसौनी गाउँपालिका–३ स्थित नेशनल पानी उद्योगमा जिल्ला प्रशासन कार्यालय, बाराले सिलबन्दी गरेको छ ।
कलैयास्थित बिक्री वितरण गरिएको उद्योगको एउटा बोतलमा माकुरा भेटिएपछि अनुगमन गर्दै प्रशासनले उद्योगमा सिलबन्दी गरेको हो । जिप्रका, बाराका सहायक प्रमुख जिल्ला अधिकारी कृष्णप्रसाद आचार्यको नेतृत्वमा गएको टोलीले उद्योगमा सिलबन्दी गरेको र उद्योगका सञ्चालक विजय यादवलाई नियन्त्रणमा लिएको थियो ।
सहायक प्रजिअ आचार्यका अनुसार उपभोक्ताले स्वास्थ्यको ख्याल गर्दै प्रशोधित बोतलको पानी खाने गरे तापनि सावधानी अपनाउन आग्रह गरे । उनले सिलबन्द बोतलको पानीमा माकुरा भेटिनु र यसले जनताको स्वास्थ्यसँग उद्योगले खेलवाड गरेपछि कानूनी प्रक्रिया अगाडि बढाइएको जानकारी गराए ।
उद्योग अनुगमन गर्ने क्रममा नेशनल पानीको तीनवटा लोगो भेटिएको, उद्योगमा जथाभावी फोहर फालिएको, उद्योगले प्रशोधित पानी भर्ने खाली बोतलहरू व्यवस्थित नरहेकोसमेत पत्ता लागेको छ ।
पानी उद्योगको मापदण्ड र नियमविपरीत सञ्चालित सो उद्योग भेटिएकोले सिलबन्दी गरी सञ्चालकलाई नियन्त्रणमा लिइ अनुसन्धान अगाडि बढाइएको बाराका सहायक प्रजिअ आचार्यको भनाइ छ ।