बारा, २६ चैत ।
सहायक हुलाकी सडक कालोपत्रे गर्नुपर्ने माग सहित स्थानीयले आइतवार कलैयाको तीनकुने चोकमा सडक अवरूद्ध पारेर धर्ना दिएका छन् ।

सो स्थानमा सडक कालोपत्र नहुंदा धुलो उड्ने गरेको कारण स्थानीयले आज बिहान साढे ७ बजे देखि सडकमै टेन्ट राखेर, आगो बालेर, ढाट लगाएर आवतजावत रोकेका छन । धर्नाकारीले कलैया उपमहानगरपालिका मेयर, बाराका प्रमुख जिल्ला अधिकारी, हुलाकी सडक योजना कार्यालय वीरगंजका प्रमुख समेतलाई यसबारे जानकारी गराइएको एकजनाले बताए ।
सो स्थानमा धूलोको कारण वृद्धवृद्धाहरु बिरामी परेको एकजना धर्नाकारीले बताए ।

सो स्थानमा तीव्र गतिमा टिपर, बस, ट्रकलगायतको सवारी साधन ओहरदोहर गर्ने गरेको कारण बुङबुङती धूलो उड्ने गरेको बताइएको छ ।
सडकमा उडेको धुलो कम गर्न उपमहानगरपालिकाले दिनहु पानी पटाउने गरे पनि त्यसको कुनै असर हुने गरेको छैन ।