फाइल तस्वीर
२६ फागुन, काठमाडौं । संस्कृति, पर्यटन तथा नागरिक उड्डयन मन्त्रालयले शनिबारदेखि पशुपति सरसफाइ अभियान सुरु गर्ने भएको छ । मन्त्रालय मातहतका सबै निकायका कर्मचारीको सहभागीतामा अब हरेक शनिबार पशुपति क्षेत्रमा सरसफाइ अभियान चलाइने छ ।
मन्त्रालयले यस अभियानमा सहभागी हुन कर्मचारीसहित संस्कृति प्रेमी, अभियन्ता, नागरिक समाज, सञ्चारकर्मीसहित आम नागरिकलाई अपिल गरेको छ । शनिबार ८ बजेदेखि १० बजेसम्म सफाइ अभियान चलाइने मन्त्रालयका प्रवक्ता राजेन्द्रकुमार केसीले जानकारी दिए ।
केसीकाअनुसार पशुपति क्षेत्रलाई प्रमुख आकर्षक स्थलका रुपमा विकास गर्न मन्त्रालयले यस्तो अभियान चलाउन लागेको हो । यो अभियान मन्त्री सुदन किरातीको अग्रसरतामा हुन लागेको हो । मन्त्री किरातीले पदभार ग्रहणकै बेला सरसफाइ अभियान चलाउने बताएका थिए ।
विमानस्थलबाट यो अभियानको सुरुवात गरेका उनले अब पशुपति क्षेत्रमा पनि अभियान सुरु गर्न लागेका हुन् ।
